សាកលវិទ្យាល័យជាតិបាត់ដំបង

សារស្វាគមន៍នាយកសាលាក្រោយបរិញ្ញាបត្រ

សូមស្វាគមន៍មកកាន់សាលាក្រោយបរិញ្ញាបត្រ នៃសាកលវិទ្យាល័យជាតិបាត់ដំបង!

សាលាក្រោយបរិញ្ញាបត្រជាអង្គភាពឈានមុខលើការបណ្ដុះបណ្ដាលថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត និងជាមជ្ឈមណ្ឌលឧត្តមភាពសម្រាប់ការស្រាវជ្រាវនៅប្រទេសកម្ពុជា ពិសេសភូមិភាគពាយ័ព្យនៃកម្ពុជា។ បច្ចុប្បន្នសាលាក្រោយបរិញ្ញាបត្របាននឹងកំពុងផ្តល់សេវាកម្មបណ្តុះបណ្តាលដល់និស្សិតមកពីគ្រប់ទិសទី ពិសេសក្នុងភូមិភាគពាយ័ព្យនៃកម្ពុជាលើថ្នាក់បរិញ្ញាបត្រជាន់ខ្ពស់ចំនួន៦ជំនាញ និងបណ្ឌិតស្រាវជ្រាវ២ជំនាញសិក្សា ដែលការបណ្តុះបណ្តាលថ្នាក់ក្រោយបរិញ្ញាបត្រនេះបាននឹងកំពុងដើរតួនាទីយ៉ាងសំខាន់ក្នុងការផ្តល់នូវឱកាសដល់និស្សិត បុគ្គលិកអប់រំ មន្ត្រីរាជការ បុគ្គលិកតាមបណ្តាគ្រឹះស្ថានរដ្ឋ និងឯកជននានា ក្នុងភូមិភាគពាយ័ព្យនៃកម្ពុជា ក្នុងការអភិវឌ្ឍនូវចំណេះដឹង សមត្ថភាព និងជំនាញស្រាវជ្រាវបន្ថែម ដើម្បីឈោងចាប់ឱកាសការងារល្អៗ និងទទួលបាននូវតួនាទីភារកិច្ចថ្មី ស្របតាមកាលានុវត្តភាពក្នុងប្រទេសកម្ពុជា និងតំបន់អាស៊ាន។

ជាមួយជោគជ័យក្នុងកិច្ចការងារបណ្តុះបណ្តាលថ្នាក់បរិញ្ញាបត្រជាន់ខ្ពស់នាពេលកន្លងមក សាលាក្រោយបរិញ្ញាបត្រ បាននឹងកំពុងបន្តបណ្តុះបណ្តាលអ្នកបច្ចេកទេសជាន់ខ្ពស់ ឆ្លើយតបនឹងតម្រូវការទីផ្សារការងារ ដែលមានសមត្ថភាពក្នុងការសិក្សា ស្រាវជ្រាវ វិភាគ ព្យាករណ៍ និងការធ្វើផែនការឆ្លើយតមនឹងការប្រែប្រួលរយៈពេលខ្លី មធ្យម និងវែង។ទន្ទឹមនឹងនេះ សាលាក្រោយបរិញ្ញាបត្រ បាននឹងកំពុងពង្រឹងគុណភាពនៃការបណ្តុះបណ្តាលលើជំនាញដែលមាន ព្រមទាំងបន្តពង្រីកវិសាលភាពក្នុងការបណ្តុះបណ្តាលបន្ថែមលើជំនាញវិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា (STEM) អោយស្របតាមផែនការយុទ្ធសាស្រ្តរបស់ក្រសួងអប់រំ យុវជន និងកីឡា ឆ្នាំ២០៣០ ពិសេសការពង្រឹង និងពង្រីកកម្មវិធីសិក្សាស្រាវជ្រាវថ្នាក់បណ្ឌិត ដែលជាធាតុចូលសំខាន់ក្នុងការកសាងធនធានមនុស្សក្នុងក្របខណ្ឌសាកលវិទ្យាល័យ ក៏ដូចជាភូមិភាគពាយ័ព្យ ដែលធាតុសំខាន់គាំទ្រនូវការអភិវឌ្ឍសេដ្ឋកិច្ចមូលដ្ឋាន និងតំបន់។សកម្មភាពនេះ ក៏ឆ្លើយតបនឹងចក្ខុវិស័យរបស់សាកលវិទ្យាល័យជាតិបាត់ដំបង ជាគ្រឹះស្ថានអប់រំឧត្តមសិក្សា ពហុជំនាញ និងស្រាវជ្រាវ ដែលមានកិត្យានុភាព ឧត្តមភាព និងការជឿទុកចិត្តក្នុងក្របខណ្ឌជាតិ និងអន្តរជាតិឆ្នាំ២០៣០។ ដូច្នេះដើម្បីសំរេចបាននូវចក្ខុវិស័យនេះ ការបណ្តុះបណ្តាលកម្រិតបរិញ្ញាបត្រជាន់ខ្ពស់ និងបណ្ឌិតពិតជាមានសារសំខាន់មិនអាចខ្វះបាន ក្នុងការកសាងធនធានមនុស្សស្នូល លើកកម្ពស់ការស្រាវជ្រាវ និងការបង្កើតថ្មី ដែលចូលរួមចំណែកក្នុងការអភិវឌ្ឍសេដ្ឋកិច្ចជាតិ និងដោះស្រាយនូវបញ្ហាសង្គម វិទ្យាសាស្រ្តនានា ស្ថិតក្នុងបរិបទនៃសកលភាហូបនីយកម្ម និងកាលានុវត្តភាពក្នុងតំបន់។

ទស្សនៈទានស្នូលនិងស្មារតីនៃការបណ្តុះបណ្តាលក្នុងសាលាក្រោយបរិញ្ញាបត្រគឺប្រព្រឹត្តទៅតាមទិសស្លោកវប្បធម៌គុណភាពនៃសាកលវិទ្យាល័យជាតិបាត់ដំបងពោលក «គុណភាពនៃកម្មវិធីសិក្សា កំណត់ឧត្តមភាពនៃនិស្សិតបញ្ចប់ការសិក្សា ឧត្តមភាពនៃនិស្សិតបញ្ចប់ការសិក្សាកំណត់ភាពជឿទុកចិត្តនៃស្ថាប័ន»។

តាំងនាមអោយថ្នាក់ដឹកនាំ និងបុគ្គលិកអប់រំក្នុងសាលាក្រោយបរិញ្ញាបត្រ ខ្ញុំបាទគោរពថ្លែងអំណរគុណ ឯកឧត្តម លោកជំទាវ លោក-លោកស្រី អ្នកនាង កញ្ញា នូវការជឿទុកចិត្តលើការបណ្តុះបណ្តាលថ្នាក់ក្រោយបរិញ្ញាបត្រក្នុងសាកលវិទ្យាល័យជាតិបាត់ដំបង។ សិក្សាថ្ងៃនេះ ដើម្បីបង្កើនពុទ្ធិ ចំណេះដឹង និងចំណេះធ្វើ ដើម្បីឧត្តមភាពការងារ និងកិត្យានុភាពលើឆាកជាតិ និងអន្តរជាតិ។

សូមគោរពអរគុណ និងអរគុណ។

 

ខ).សាវតា

ការបណ្តុះបណ្តាលថ្នាក់ក្រោយបរិញ្ញាបត្រក្នុងសាកលវិទ្យាល័យជាតិបាត់ដំបងបានចាប់ផ្តើមក្នុងឆ្នាំ២០០៧ជាមួយនឹងការបណ្តុះបណ្តាលជំនាញគ្រប់គ្រង ដែលជាលទ្ធិផលនៃការបណ្តុះបណ្តាលជិត ២០ឆ្នាំមកនេះ សាកលវិទ្យាល័យជាតិបាត់ដំបងបានបណ្តុះបណ្តាលនិស្សិតប្រមាណ ៥៦៨នាក់ ដែលបានបញ្ចប់ការសិក្សាប្រកបដោយជោគជ័យ និងបច្ចុប្បន្នកំពុងបំរើការក្នុងគ្រឹះស្ថានអប់រំស្រាវជាវ រដ្ឋនិងឯកជននានា ស្ថាប័នជំនាញរបស់រដ្ឋ អង្គការសង្គមស៊ីវិល    ក្រុមហ៊ុនឯកជន និងដំណើរការធុរៈកិច្ចផ្ទាល់ខ្លួន ដែលជាកំលាំងចលករក្នុងការអភិវឌ្ឍសេដ្ឋកិច្ចជាតិ។ ជាមួយភាពជោគជ័យនៃការបណ្តុះបណ្តាលថ្នាក់បរិញ្ញាបត្រជាន់ខ្ពស់ និងតម្រូវការនៃការដំណើរបណ្តុះបណ្តាលជំនាញថ្មីស្របនឹងតម្រូវការទីផ្សារការងារ សាកលវិទ្យាល័យជាតិបាត់ដំបងបានសម្រេចស្នើសុំក្រសួងអប់រំ យុវជន និងកីឡា ក្នុងបង្កើតសាលាក្រោយបរិញ្ញាបត្រនៃសាកលវិទ្យាល័យជាតិបាត់ដំបងដើម្បីធ្វើអោយប្រសើរឡើងនូវគុណភាព និងប្រសិទ្ធភាពនៃការបណ្តុះបណ្តាលថ្នាក់ក្រោយបរិញ្ញាបត្រ។

សាលាក្រោយបរិញ្ញាបត្រ នៃសាកលវិទ្យាល័យជាតិបាត់ដំបងបានបង្កើតឡើងតាមរយៈប្រកាសលេខ ១០២៤ អយក.ប្រក ចុះថ្ងៃទី២១ ខែមិថុនា ឆ្នាំ២០១៩ ស្ដីពី ការបង្កើតសាលាក្រោយបរិញ្ញាបត្រ នៅសាកលវិទ្យាល័យជាតិបាត់ដំបង ដែលមានបេសកកម្មក្នុងការដឹកនាំ គ្រប់គ្រងការងារបណ្តុះបណ្តាល និងស្រាវជ្រាវថ្នាក់ក្រោយបរិញ្ញាបត្រកម្រិតបរិញ្ញាបត្រជាន់ខ្ពស់ និងបណ្ឌិតក្នុងក្របខណ្ឌសាកលវិទ្យាល័យជាតិបាត់ដំបង។ បច្ចុប្បន្ន សាលាក្រោយបរិញ្ញាបត្រ នៃសាកលវិទ្យាល័យជាតិបាត់ដំបង កំពុងបន្តបណ្តុះបណ្តាលនិស្សិតកម្រិតបរិញ្ញាបត្រជាន់ខ្ពស់ និងថ្នាក់បណ្ឌិតស្រាវជ្រាវចំនួនលើសពី ១៦០ នាក់ ពោលសាលាក្រោយបរិញ្ញាបត្រ បាននឹងកំពុងដំណើរការបណ្តុះបណ្តាលនិស្សិតថ្នាក់បរិញ្ញាបត្រជាន់ខ្ពស់លើ ១០ជំនាញសំខាន់ៗតួយ៉ាង ថ្នាក់បរិញ្ញាបត្រជាន់ខ្ពស់ជំនាញគ្រប់គ្រងធុរកិច្ចចំនួន ០២ឯកទេស គឺគ្រប់គ្រងអាជីវកម្មឌីជីថល និងសហគ្រិនភាព និងនវានុវត្តន៍ (MBA-MDBM and MBA-MEI) រដ្ឋបាលសាធារណៈ (MPA) អភិបាលកិច្ច និងគោលនយោបាយសាធារណៈ (GPP) បង្រៀនភាសារអង់គ្លេស(MTESOL) និរន្តរភាពកសិកម្ម (MSA) ជំនាញវិទ្យាសាស្រ្តអប់រំ (MES) គ្រប់គ្រងហិរញ្ញវត្ថុ (MFM) ប្រព័ន្ធគ្រប់គ្រងព័ត៌មាន (MIS) និងអក្សរសាស្រ្តខ្មែរ (MKL) ព្រមទាំងបណ្តុះបណ្តាលថ្នាក់បណ្ឌិតស្រាវជ្រាវលើ ពីរជំនាញ ១. វិទ្យាសាស្ត្រអប់រំ ឯកទេសគ្រប់គ្រងអប់រំ(PhD-EM) និង វិទ្យាសាស្រ្ត ឯកទេសនិរន្តភាពនៃការគ្រប់គ្រងប្រព័ន្ធអេកូឡូស៊ី(PhD-SEM)ដែលក្នុងនោះសាលាក្រោយបរិញ្ញាបត្របានទទួលជោគជ័យលើការបណ្តុះបណ្តាលថ្នាក់បរិញ្ញាបត្រជាន់ខ្ពស់លើមុខជំនាញគ្រប់គ្រងពាណិជ្ជកម្ម ១៧ជំនាន់ រួចមកហើយ ជំនាញរដ្ឋបាលសាធារណ: ១០ជំនាន់ ជំនាញបង្រៀនភាសាអង់គ្លេស ០៧ជំនាន់  និងជំនាញកសិកម្មប្រកបដោយចីរភាព ០៧ជំនាន់ ។

ហេតុអ្វីសិក្សាថ្នាក់បរិញ្ញាបត្រជាន់ខ្ពស់នៅសាកលវិទ្យាល័យជាតិបាត់ដំបង

គ).ចក្ខុវិស័យ

សាលាក្រោយបរិញ្ញាបត្រនៃសាកលវិទ្យាល័យបាត់ដំបងជាថ្នាលបណ្តុះបណ្តាលអ្នកដឹកនាំដែលមានសក្តានុពលនាពេលអនាគតលើវិស័យអប់រំ ធុរកិច្ច រដ្ឋបាលសាធារណៈ កសិកម្ម និងអេកូឡូស៊ី ជាមួយនឹងកម្មវិធីអប់រំស្តង់ដាជាតិនិងអន្តរជាតិ ដែលមានឧត្តមភាពក្នុងការផលិតនិស្សិតពហុជំនាញ ប្រកបដោយចំណេះដឹង ចំណេះធ្វើការ និងភាពច្នៃប្រឌិតខ្ពស់ស្របតាមតម្រូវការអភិវឌ្ឍសង្គម សេដ្ឋកិច្ច និងបរិស្ថាននៅកម្ពុជា និងតំបន់។

ឃ).បេសកកម្ម

ដើម្បីឆ្លើយតបទៅនឹងចក្ខុវិស័យខាងលើ សាលាក្រោយបរិញ្ញាបត្រមានបេសកកម្ម ដូចខាងក្រោម៖

1. អប់រំបណ្តុះបណ្តាលនិស្សិតថា្នក់បរិញ្ញាបត្រជាន់ខ្ពស់ និងថ្នាក់បណ្ឌិតប្រកបដោយ គុណភាព ប្រសិទ្ធិភាព និងសមធម៌ ស្របតាមតំរូវការទីផ្សារការងារក្នុងប្រទេស ពិសេសភូមិភាគពាយ័ព្យនៃកម្ពុជា។
2. លើកម្ពស់សមត្ថភាពស្រាវជ្រាវ បុគ្គលិកអប់រំ អ្នកស្រាវជ្រាវ និងនិស្សិតកម្ពុជានូវជំនាញស្រាវជ្រាវវិទ្យាសាស្រ្ដ វិទ្យាសាស្ត្រសង្គម និងជំនាញគាំទ្រដល់ការអភិវឌ្ឍសេដ្ឋកិច្ចជាតិ។ 
3. បណ្តុះគំនិតនវានុវត្តន៍ និងជំរុញការបង្កើតផលិតផលស្រាវជ្រាវថ្មី ក្នុងភាពជាដៃគូជាមួយសហគមន៍ ស្ថាប័នជាតិ និងអន្តរជាតិ ដែលគាំទ្រដល់ដំណើរការអន្តរតូបនីយកម្មកម្មវិធីសិក្សា និងឧត្តមភាពការងារសម្រាប់និស្សិតដែលបញ្ចប់ការសិក្សា។

ង).ទិសដៅជាយុទ្ធសាស្រ្ត

• =>ការធ្វើបច្ចុប្បន្នភាពកម្មវិធីសិក្សាថ្នាក់បរិញ្ញាបត្រជាន់ខ្ពស់ និងបណ្ឌិតអោយស្របនឹងស្តង់ដាជាតិនិងអន្តរជាតិ ផ្សាភា្ជប់នឹងតម្រូវការទីផ្សារការងារ។ 
• =>ការកសាងសមត្ថភាពគ្រូបង្រៀន អ្នកស្រាវជ្រាវ និងការបង្កើនកម្រិតគុណវុឌ្ឍគ្រូបង្រៀនស្របតាមកម្មវិធីសិក្សា 
• =>ការកែលម្អវិធីសាស្រ្តបង្រៀនកម្រិតបរិញ្ញាបត្រជាន់ខ្ពស់ដោយកែប្រែការបង្រៀនពីបែបអត្ថន័យមេរៀនជាមូលដ្ឋានបកជាបំនិនជាមូលដ្ឋាន 
• =>បង្កើនការចូលរួមរបស់សហគមន៍ក្នុងសកម្មភាពរៀន និងបង្រៀន និងការស្រាវជ្រាវ និងការផ្តល់សេវាសង្គម 
• =>ការធ្វើអន្តរតូបនីយកម្មនៃកម្មវិធីសិក្សា(ការរៀបចំមុខវិជ្ជាអន្តរជាតិ ការផ្លាស់ប្តូប្រព័ន្ធក្រេឌីតសិក្សា) 
• =>បង្កើនការស្រាវជ្រាវដោយផ្អែកលើវិទ្យាសាស្រ្តជាមូលដ្ឋានគាំទ្រដល់ការសម្រេចចិត្តនិងផែនការអភិវឌ្ឍប្រកបដោយចីរភាព 
• =>ការធ្វើទំនើបកម្មវិធីសាស្រ្តបង្រៀនតាមរយៈការបញ្ជៀបការប្រើប្រាស់ប្រព័ន្ធបច្ចេកវិទ្យា(ICT)ក្នុងការរៀននិងបង្រៀន 
• =>បង្កើនភាពប្រកួតប្រជែងកម្មវិធីសិក្សាថ្នាក់ក្រោយបរិញ្ញាបត្រ ឧត្តមភាពនៃនិស្សិតបញ្ចប់ការសិក្សា និងការផលិតលផស្រាវជ្រាវ កម្មសិទ្ធបញ្ញា

ច).រចនាសម្ព័ន្ធគ្រប់គ្រង

សាលាក្រោយបរិញ្ញាបត្រ មានដេប៉ាតឺម៉ង់ចំណុះចំនួន២ គឺដេប៉ាតឺម៉ង់សិក្សាថ្នាក់បរិញ្ញាបត្រជាន់ខ្ពស់ និងដេប៉ាតឺម៉ង់សិក្សាថ្នាក់បណ្ឌិតស្រាវជ្រាវ អមដោយអង្គភាពចំណុះ២ផ្សេងទៀតគឺផ្នែកគ្រប់គ្រងការងាររដ្ឋបាលនិងសិក្សា និងផ្នែកគ្រប់គ្រងការស្រាវជ្រាវនិងគម្រោងអភិវឌ្ឍនានាក្នុងក្របខណ្ឌសាលាក្រោយបរិញ្ញាបត្រ។ អង្គភាពចំណុះទាំង៤នេះ ជាតួអង្គសម្របសម្រួល ប្រឹក្សាយោបលបច្ចេកទេស និងគាំទ្រដំណើរការរៀននិងបង្រៀន ការងារស្រាវជ្រាវរបស់និស្សិតថ្នាក់ក្រោយបរិញ្ញាបត្រ ដើម្បីធានាអោយបាននូវគុណភាព ប្រសិទ្ធភាព និងសមធម៌ ក្នុងការបណ្តុះបណ្តាលថា្នក់បរិញ្ញាបត្រជាន់ខ្ពស់ និងថ្នាក់បណ្ឌិត អោយស្របតាមស្តង់ដារជាតិ និងអន្តរជាតិ។

កម្មវីធីសិក្សថ្នាក់បរិញ្ញាបត្រជាន់ខ្ពស់ ជំនាញ៖

១. គ្រប់គ្រងធុរកិច្ច ឯកទេសគ្រប់គ្រងអាជីវកម្មឌីជីថល (Master of Business Administration in Digital Business Management) [MBA-MDBM]

២. គ្រប់គ្រងធុរកិច្ច ឯកទេសសហគ្រិនភាព និងនវានុវត្តន៍ (Master of Business Administration in Entrepreneurship and Innovation) [MBA-MEI]

៣. រដ្ឋបាលសាធារណៈ (Master of Public Administration – MPA)

៤. អភិបាលកិច្ច និងគោលនយោបាយសាធារណៈ (Master of Public Administration in Governance and Public Policies – GPP)

៥. បង្រៀនភាសាអង់គ្លេស (Master of Teaching English to Speakers of Other Languages [MTESOL])

៦. វិទ្យាសាស្រ្តអប់រំ ឯកទេសគ្រប់គ្រងអប់រំ (Master of Educational Science in Educational Management – MES)

៧. និរន្តភាពកសិកម្ម (Master of Sustainable Agriculture – MSA)

៨. គ្រប់គ្រងហិរញ្ញវត្ថុ (Master of Financial Management – MFM) 

៩. ប្រព័ន្ធគ្រប់គ្រងព័ត៌មាន (Master of Management Information System – MIS)

១០. អក្សរសាស្រ្តខ្មែរ (Master of Khmer Literature – MKL)

កម្មវីធីសិក្សថ្នាក់បណ្ឌិតស្រាវជ្រាវជំនាញ ៖

១. និរន្តរភាពនៃការគ្រប់គ្រងប្រព័ន្ធអេកូឡូស៊ី (PhD  in Sustainable Ecosystem Management)

២. គ្រប់គ្រងអប់រំ (PhD in Educational Management)

បរិញ្ញាបត្រជាន់ខ្ពស់ ជំនាញគ្រប់គ្រងធរុកិច្ច (MBA)

បណ្តុះគំនិតផ្តួចផ្តើមអ្នកសិក្សាក្នុងការបង្កើតធុរកិច្ចជំនាន់ថ្មី(Start Up) និងសហគ្រិនភាព ដើម្បីបង្កើនឧត្តមភាពការងារដល់និស្សិត និងភាពប្រកួតប្រជែងកម្លាំងពលកម្ម ព្រមទាំងផ្តល់ចំណេះដឹង ជំនាញក្នុងការគ្រប់គ្រងធុរកិច្ចតាមបែបវិទ្យាសាស្រ្តសម័យទំនើបក្នុងការគ្រប់គ្រងធនធានមនុស្ស ហិរញ្ញវត្ថុ ក្រមសីលធម៌ក្នុងវិស័យធុរកិច្ច និងការបង្កើតយុទ្ធសាស្ត្រទីផ្សារក្នុងបរិបទបដិវត្តឧស្សាហកម្ម៤.០។

មុខវិជ្ជាសំខាន់ៗក្នុងកម្មវិធីអប់រំ៖

Business planning and strategy	Managerial economics
Quantitative business analysis	Market strategy and E-commerce
Operation and quality management	Leadership and change management
Financial planning and management	Research related subject

ឱកាសការងារ

• ជាអ្នកគ្រប់គ្រងថ្នាក់កណ្តាល ឬថ្នាក់ខ្ពស់តាមបណ្តាលអង្គភាពរដ្ឋ និងឯកជន
• ជាសហគ្រិនធុរកិច្ចជំនាន់ថ្មី(Start-Up)
• ជាអ្នកប្រឹក្សាយោបល់ជាតិ-អន្តរជាតិ ផ្នែកធុរកិច្ច និងងគម្រោងវិនិយោគ
• ជាប្រធានក្រុមហ៊ុន អ្នកបច្ចេកទេសជាន់ខ្ពស់តាមបណ្តាលអង្គភាពរដ្ឋ និងឯកជន
• ជាសាស្ត្រាចារ្យ អ្នកស្រាវជ្រាវ តាមបណ្តាលគ្រឹះស្ថានសិក្សាស្រាវជ្រាវរដ្ឋ និងឯកជន

បរិញ្ញាបត្រជាន់ខ្ពស់ ជំនាញរដ្ឋបាលសាធារណៈ (MPA)

បង្កើនសមត្ថភាពវិភាគ វាយតម្លៃ និងបង្កើតគោលនយោបាយសាធារណៈរដ្ឋ និងឯកជនឆ្លើយតបនឹងបញ្ហាប្រឈមសង្គមសេដ្ឋកិច្ច។ កម្មវិធីអប់រំនេះផ្តល់ដល់និស្សិតនូវចំណេះដឹងរដ្ឋបាលមូលដ្ឋានថ្នាក់ជាតិនិងថ្នាក់ក្រោមជាតិ  ការអនុវត្ត តាមដាន និងការវាយតម្លៃនីតិវិធីរដ្ឋបាល ព្រមទាំងការរៀបចំផែនការសម្រាប់គ្រប់គ្រងប្រជាជន និងរដ្ឋបាលដែនដី ស្របតាមគោលនយោបាយកំណែទម្រង់របស់រាជរដ្ឋាភិបាលកម្ពុជា។

មុខវិជ្ជាសំខាន់ៗក្នុងកម្មវិធីអប់រំ៖

Policy process and analysis	Public service management
Administrative contract law	Investment analysis
Human resource management	Public financial planning and management
Terrestrial administrative management	Research related subjects

ឱកាសការងារ

• ជានាយក ឬប្រធានផ្នែករដ្ឋបាលតាមគ្រឹះស្ថានរដ្ឋបាលសាធារណៈរដ្ឋ និងឯកជន
• ជាអភិបាលខេត្ត-រាជធានី អភិបាលស្រុក-ក្រុង ក្រុមប្រឹក្សាខេត្ត-រាជធានី ក្រុមប្រឹក្សាស្រុក-ក្រុង
• ជាអ្នកប្រឹក្សាយោបល់ វិភាគ វាយតម្លៃ និងបង្កើតគោលនយោបាយសាធារណៈថ្នាក់ជាតិ និងថ្នាក់ក្រោមជាតិ
• ជាតំណាងរាស្រ្ត មន្ត្រីជាន់ខ្ពស់ក្នុងមុខតំណាងសាធារណៈក្នុងរាជរដ្ឋាភិបាល
• ជាសាស្រ្តាចារ្យ  អ្នកស្រាវជ្រាវ ក្នុងគ្រឹះស្ថានឧត្តមសិក្សារដ្ឋ និងឯកជន

បរិញ្ញាបត្រជាន់ខ្ពស់ ជំនាញវិទ្យាសាស្ត្រអប់រំ (MES)

បង្កើនសមត្ថភាពដល់និស្សិតក្នុងការរៀបចំវិធីសាស្រ្តបង្រៀន កម្មវិធីអប់រំ ផែនការសកម្មភាពបង្រៀន និងដោះស្រាយបញ្ហានានាដែលកើតមាននៅក្នុងថា្នក់រៀន។ កម្មវិធីអប់រំនេះបញ្ចូលទាំងទ្រឹស្តី គោលគំនិត នឹងការអនុវត្តជាក់ស្តែង ស្របតាមបច្ចុប្បន្នភាពនៃតម្រូវការទីផ្សារការងារផ្នែកបង្រៀនភាសាអង់គ្លេស និងគ្រប់គ្រងអប់រំ។ និស្សិតបញ្ចប់ការសិក្សាក្នុងកម្មវិធីអប់រំនេះនឹងក្លាយជាអ្នកដឹកនាំអប់រំប្រកបដោយប្រសិទ្ធភាព និងឧត្តមភាព។

មុខវិជ្ជាសំខាន់ៗក្នុងកម្មវិធីអប់រំ៖

Second language acquisition	Advanced Teaching Methodology
Advanced applied linguistic	TESOL practicum
Curriculum design and development	Educational psychology
ICT in English language teaching	Research related subjects

ឱកាសការងារ

• ជាអ្នកប្រឹក្សាយោបល់ផ្នែកអប់រំ គោលនយោបាយអប់រំតាមបណ្តាស្ថាប័នជាតិ និងអន្តរជាតិ
• ជាសាស្រ្តាចារ្យ អ្នកស្រាវជ្រាវតាមបណ្តាគ្រឹះស្ថានឧត្តមសិក្សារដ្ឋ និងឯកជន
• ជាអ្នកបច្ចេកទេសជាន់ខ្ពស់ផ្នែកអភិវឌ្ឍកម្មវិធីអប់រំបណ្តាស្ថាប័នជាតិ និងអន្តរជាតិ
• ជាអ្នកបង្កើតគោលនយោបាយអប់រំផ្នែកបង្រៀនភាសាអង់គ្លេស
• ជាអ្នកសម្របសម្រួលគម្រោងអភិវឌ្ឍ និងវិនិយោគនានាក្នុងវិស័យអប់រំ
• ជាសហគ្រិនផែ្នកគ្រប់គ្រងអប់រំ នាយកគ្រឹះស្ថានភាសាបរទេសរដ្ឋ និងឯកជន។

បរិញ្ញាបត្រជាន់ខ្ពស់ ជំនាញនិរន្តរភាពកសិកម្ម (MSA)

ផ្តល់ឱកាសដល់និស្សិត និងអ្នកស្រាវជ្រាវកម្ពុជាក្នុងការអភិវឌ្ឍសមត្ថភាព ចំណេះដឹង និងជំនាញកសិកម្មតាមបែបនិរន្តរភាព ឆ្លើយតបនឹងស្ថានភាពសង្គមសេដ្ឋកិច្ច និងបរិស្ថានបច្ចុប្បន្ននៅកម្ពុជា។ កម្មវិធីអប់រំនេះផ្តល់ជូននិស្សិតនូវជំនាញវិភាគ ដោះស្រាយបញ្ហា និងសហគ្រិនភាពកសិកម្ម ក្នុងការលើកកម្ពស់តម្លៃកសិផលក្នុងខ្សែចង្វាក់ផលិតកម្ម (Agricultural value chain) ធានាឱ្យបាននូវសន្តិសុខស្បៀងឆ្លើយតបនឹងការប្រែប្រួលយ៉ាងឆាប់រហ័សជាសកលក្នុងតំបន់ និងពិភពលោក។

មុខវិជ្ជាសំខាន់ៗក្នុងកម្មវិធីអប់រំ៖

Concept of sustainable agriculture	Plant nutrient and soil fertility management
Agro-ecosystem analysis	Integrated natural resource management
Agriculture economics	Seed production and quality management
Integrated farming system	Research related subjects

ឱកាសការងារ

• ជាសហគ្រិនជំនាន់ថ្មីលើវិស័យកសិកម្ម កសិឧស្សាហកម្ម
• ជាសាស្រា្តចារ្យ អ្នកស្រាវជ្រាវ បម្រើការក្នុងគ្រឹះស្ថានឧត្តមសិក្សារដ្ឋ និងឯកជន
• ជាអ្នកគ្រប់គ្រង សម្របសម្រួល គម្រោងធុរកិច្ច និងវិនិយោគកសិកម្ម
• ជាអ្នកប្រឹក្សាយោបល់លើវិស័យកសិកម្មថ្នាក់ជាតិ និងអន្តរជាតិ
• ជាអ្នកបច្ចេកទេសជាន់ខ្ពស់និរន្តរភាពកសិកម្មតាមស្ថាប័នជាតិ អង្គការសង្គមស៊ីវិលជាតិ និងអន្តរជាតិ។

បរិញ្ញាបត្រជាន់ខ្ពស់ ជំនាញគ្រប់គ្រងហិរញ្ញវត្ថុ (MFM)

ផ្ដល់ឱកាសដល់និស្សិតលើជំនាញគ្រប់គ្រងហិរញ្ញវត្ថុ ការវិភាគការវិនិយោគ ការគ្រប់គ្រងហានិភ័យ ហិរញ្ញវត្ថុសាជីវកម្ម និងការវិភាគទីផ្សារហិរញ្ញវត្ថុ។ កម្មវិធីបណ្ដុះបណ្ដាលមានការសិក្សាទ្រឹស្ដី ផ្សារភ្ជាប់និងការអនុវត្តជាក់ស្ដែង ដើម្បីស្វែងយល់ពីប្រតិបត្តិការ និងការគ្រប់គ្រងហិរញ្ញវត្ថុ

មុខវិជ្ជាសំខាន់ៗក្នុងកម្មវិធីអប់រំ៖

Corporate Finance	Programming for Finance Professional
Financial Planning and Management	Stock Exchange Investment
International Finance	Green Entrepreneurship
Econometrics for Finance	Portfolio management

ឱកាសការងារ

• ជាអ្នកវិភាគហិរញ្ញវត្ថុ
• ជាសាស្រ្តាចារ្យតាមបណ្តាគ្រឹះស្ថានឧត្តមសិក្សារដ្ឋ និងឯកជន
• ជាអ្នកជំនាញវិនិយោគហិរញ្ញវត្ថុ
• ជាអ្នកគ្រប់គ្រងហិរញ្ញវត្ថុ
• ជាអ្នកគ្រប់គ្រងហានិភ័យហិរញ្ញវត្ថុ
• ជាសហគ្រិន ធុរកិច្ចជំនាន់ថ្មី