———————————
នៅថ្ងៃព្រហស្បតិ៍ ១២កើត ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៦ ខែតុលា ឆ្នាំ២០២៣ ដេប៉ាតឺម៉ង់ភាសាអង់គ្លេសនៃវិទ្យាស្ថានភាសាបរទេស បានរៀបចំកម្មវិធីប្រកួតនិយាយ និងតស៊ូមតិជាភាសអង់គ្លេសប្រចាំឆ្នាំ២០២៣ ពានរង្វាន់ឯកឧត្តមសាកលវិទ្យាធិការ(Rector’s Awards)។ កម្មវិធីនេះត្រូវបានធ្វើឡើងក្រោមវត្តមានដ៏ខ្ពង់ខ្ពស់ ឯកឧត្តម សុខ ឃន សាកលវិទ្យាធិការនៃសាកលវិទ្យាល័យជាតិបាត់ដំបង។ គោលបំណងនៃការបង្កើតកម្មវិធីនេះឡើងគឺដើម្បីធ្វើការហ្វឹកហ្វឺននិស្សិតឱ្យមានភាពក្លាហាន និងជឿជាក់ក្នុងការនិយាយភាសាអង់គ្លេសជាសាធារណៈ និងដើម្បីផ្តល់ឱកាសឱ្យនិស្សិតបានបង្ហាញសមត្ថភាពរបស់ខ្លួនផងដែរ។ ក្រៅពីការសិក្សាក្នុងថ្នាក់ជាមួយគ្រូបង្រៀនដែលមានជំនាញច្បាស់លាស់ និងបទពិសោធន៍គ្រប់គ្រាន់ ដេប៉ាតឺម៉ង់ភាសាអង់គ្លេសតែងតែបង្កើតឱ្យមានសកម្មភាពសិក្សាក្រៅម៉ោងជាច្រើនដូចជាសកម្មភាពប្រកួតនិយាយ និងតស៊ូមតិនេះជាដើមដើម្បីផ្តល់ឱកាសឱ្យនិស្សិតបានអនុវត្តជាក់ស្តែងនូវចំណេះដឹង និងជំនាញដែលខ្លួនបានបណ្តុះបណ្តាល។
